مرثية الشهيد الفارس/
يوسف علي حمودة الرفاعي (الدحيش).
********
محمد الفاتح أبوعاقلة
********
أيام الله محسوبة ومصيرنا مسطر
ؤيوسف قدرو يمشيها ؤدمو معطر
سيرتو نقية مما قام رفاعي مبطر
ياما شتت العدو خل دميو تتقطر
***
نبيلة فعايلو كل الناس بتتحكابا
ثباتو يفوق على أسدا نتر في غابة
طبعا راسي كاسيو بى وقار ومهابة
وحين صايح الوطن ناداه ما اتغابي
***
سليل أولاد عويضة نحاس
وعز وجساره
صبيهن أصلو ما بحمل هوان
وحقارة
بخت في راس عدوهو محاورو
حمره ناره
فارسا فقدو للسودان نقاص
وخساره
***
بعجز قولنا إن دايرين نوصفو
ليكم
مثبوتات فضايلو الما بتخفى
عليكم
أكان في القوز مصندد للبجي
يعاديكم
بتشهدلو الحدود بى روحو كان بفديكم
***
يا عبد العزيز فقد الدحيش ما هين
عزانا عرفنا فارس صيتو ذايع وبين
راتي على الأهل لعدوهو سيفو يزين
حجر ديرتو حقاني وعصامي ودين
***
مصير الحي يفارق الدنيا ماهو مخلد
لكن واجبو يترك سيرة زين تتقلد
ختاها الدحيش كاتال وقلبو مجلد
ما بجخ بى نضم ممجوج ولا بتبلد
***
رحمة ربي تغشاو في نعيم الجنة
يسعد فيها يقدل وبالسرور يتهنى
ينال فضل الشهادة وكل ما يتمنى
مشهود ليهو مما قام سخي وما ضن
***
ؤيا عبد العزيز دعواتنا ليهو تملي
فارقها العبوس الزايلة ما بتضلي
شهدو الرابعوهو ذخيرتو ما بتجلي
بقنص للعدو الصايل مدق بالملي
***
سمح الزول يسو الشكره يتسمابا
سواها الدحيش طلب الشهادة وجابا
ما بتلاقى كان للموت عديل بتشابا
راكز وما بزح هامة خصيمو أصابه
***
مما قام بطل والدوس بيعرف فنو
والفايت الحدود بعنا وبطير جنو
في النايبات مدرب والمحن بتسنو
ما مات الدحيش أبدا ولا حاسبنو
***
هنيالكم رفاعة بسجل التاريخ
كتابا صيتو طايل سامك المريخ
ده تيلاد رافع العدم عدو السريخ
ؤود جماع كمان أ للرؤوس فليخ
***
المربوتة شهدت كيف حسمتو كماجه
مضروبكم جزم مفقود ولا بتعاجى
ياكم مقنع النايرة المزند عاجة
بتراشا البجيكم ضمه ما بدور حاجة
***
يوسف فارس العركة البدودي نحاسه
يوسف بقرض الصايل بجزو مواسى
يوسف قوة يوسف خوة كلو فراسه
يوسف نجدة المظلوم مِمَتِّن ساسه
***
معلوم الدحيش ولدة صحاح ونجاح
بشرو خريف بشرو رتوع بشرو صباح
عداوتو دمار عداوتو ودار وتاني قماح
بنسأل خالق الكون في الجنان يرتاح
***
آمين !
(محمد الفاتح أبوعاقلة).
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.