في شان العمل
شعر: محمّد الفاتح يوسف أبوعاقلة
بتوكل علـــى الله وبشـــــــــــــــــــدوا ضراعي
كان تربال وكان سبابي كان حت راعي
ما بحرس لى ضل قايلة وأنوم متداعي
لا بدن أحرت الكف ؤأنجــــــــــــــض واعي
***
شن داير تشيــــــــــــــــل لامن تودع عولك
وجوك الناس ؤفوق العنقريــــــــب شالولك
غير ما يكون حكاوي يجيبه فعلك وقولك
لا تقعد بروس بى عرضــــــك إنت وطولك
***
ســو حفر إيدك اتبيـــــــــــــن ؤميز هولك
تبقى بيان عيان وفيت وجب محصولك
تقدر تجعل الداينك زمــــان مديــــــــــــــونك
تنفع والديــــك وأهلك تقيــــــــــف يا طولك
***
ما ها صعيــــــبة يا زول البنا من طوبة
والنيـــــــــة السليــــــــمة تطيـّــــب المعطوبة
ما دام الشباب قــــوة وفتـــــــــــــوة وحوبة
ليش ما نقضّي للواجبة ؤنمشي دروبة
***
ناس جد جدك الفاتــــو العمـــل وفوهو
والبنشوفو جابــــر في البلد عرفوهـــــــو
قاموا وصلـــــــوا بدري والعكـــر صفوهو
والضيف البجي كبــــــد الضلام كفوهو
***
وناس جدك قريب قالوا السفيه أرجاهو
بكره بتوب وبرجع ليك عديـــــــــل تلقاهو
لكن القعـــد عاطـــــــــــــل ولا تبراهـــــــــــــــــو
حشّاش بى دقينتو والتّراب سفاهـــــــــو
***
كمان عاين أبوك لليلـــــــــة خدرة قنايتو
ما برضى القعاد ساكت همل في تايتو
إن قت ليـــــــو كفاك بزعل وشيل جرّايتو
ما بهمو النّهـــــــــار قايل كــــرب حرايتــــو
***
الزول كيف ينوم ؤياكل وفيـــــرة أبواتو
دون ما يرد جمايـــل العمـــــروها وفاتو
ياهـــا أمانـــــة والعاقل بزكـــــــــــــي حياتو
غاليـــــــــة وقاسيــة لكن الغلا بى حلاتو
***
يلاك ياشباب هيــــــــــلا النســــــــــد الفرقة
نبقاله البلد سندالـــــــــــة قــــــوة ودرقـــــــة
بنجيب بنكنوت الورقـــــــــة فوق الورقة
ما بنخل عَرقنا يروح شمــار في مرقـــة
***
الرّزق الحلال ربك وكيـــــــــلك سيــــــــدو
والكف السّخــــــي كل الخلوق بتريـــــدو
لا تحقر القليــــــل البركـــــــة بكـــره تزيدو
والزول حقــو مهمـــــا كان قليــل بيفيدو
***
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.