الاثنين، 6 ديسمبر 2010

وحدة الوجدان نحو وحدة السودان Unit conscience about the unity of Sudan

أوبريت وحدة السُّودان
                            بقاعة البروفيسور أحمد الطيِّب محمَّد
                                    بجامعة السُّودان المفتوحة
قدَّمت شعبة موسيقى شرطة ولاية الخرطوم، صباح الاثنين الموافق 6 ديسمبر 2010 وتحت رعاية جامعة السودان المفتوحة تجربة أوبريت وحدة السودان، والذي يدعو إلى تماسك أجزاء الوطن من خلال الوحدة والتعايش بين أهله.
ولقد شرفها بالحضور الدكتور جلال من الله مدير الجامعة وحشد طيب من الأساتذة والعاملين بالجامعة. 

الأحد، 5 ديسمبر 2010

الايدز Aids

الايدز

شعر محمّد الفاتح يوسف أبوعاقلة
أبقـى على حلالك أوعـى لا تتغشَّى
ورم الايدز لعين بى هينة ما بنفشَّـة
يمسك في الدرب داير الملاين  الهشَّة
يسلب زولو تاركو ارق مـن القشَّـة
***
ما بعادي السلام أبداً ولا فـي اللمَّـة
ولا البعوض بعرفو وبيهـو ما بتسمَّى
جارك إن عطس أو قحة مافي مهمَّة
لكين شيل دموم الناس معـاهو مغمَّة
***
ابقـى على حلالك للــرِّمم لا تقارب
طاهرات الجناح تيـلاد جـدود وأقارب
في ستر العـروض سابق مثلنا ؤضارب
فرق العفـة من الجتـة هـادم ؤخارب
***
تورم غدتك وزنك يخـــف وبتورد
تجيك شقيقة حارة وحمى عرقك بـورد
كاروشة وصبيب مرضان تنف ومزورد
بالصح إن تبعت الغي بتبقى مهــورد
***
في زحمة ملم الناس تهـــز ؤتسـالم
في تليفون ترد تنضم كتيـــر ؤتسالم
ؤفي كنب الفصول جارك تشور ؤتفاهم
ما فيش ضر بجيك إيــاك طيِّب سالم
***
العيان رقـد مستشفى أمشــي  وزورو
مافيش حاجة باقي الايدز غريقة بحـورو
الكاتيـــن بعومو وللسبـاحة بـدورو
سالميـــن من معاداتو  وبشاتن جورو
***
في المطعــم مآكل كلنـا بنغشــاها
نشرب فيها شـاهي ومويــة ما بناباها
ما دام ات عفيف العــدوى ما تخشاها
ابقى حصيف حريف طِبْ نَفْسك اتلافاها
***
عدوى الايدز تكون من إبرة طعنوك بيها
واللا قدود نسيها لى شافعة في اضنينها
شيل دم الحجامــة وعدتـو الساعيها
امكن نلقـى مرض الايدز مكمَّـن فيها
***
الأم النجيضة تكون عوافـي ضنـاها
تحفظ  نفسها من كل عيــب يشناها
أكان أدوها دم فيو ايدز بضر بى جناها
هدا أمر مخيـف والفالحة تسعـى هناها
***
عـادات الشلـوخ سالفاً قديم اتتـاحت
معاو ضرراً كبير مكروه دموماً ساحت
إن عُدم العفاف والسترة فاتت راحـت
تبقى شمس سعودنا اتدردقت بل طاحت
***
معروف يا بلد من بدري سوح العرفة
أماتنا الأُصال ما عرفن ابداً  خفَّــة
سابلات القناع خاتيات بشاتـن ؤتِفَّـة
نافيـات النقاص متوشحـات بالعفَّـة
*** 
نسأل الله العافية لكل أمة سيدنا محمَّد صلَّى الله عليه وسلّم من أمراض عصرنا الذي يباغت الناس بكل عجيب وغريب ..آميــــــــــــــــن !!!!!