الخميس، 17 أبريل، 2014

الجمام ... نص للمدينة البهية المنسية... محمد الفاتح أبوعاقلة



الجَمَّـام ..
                            شعر محمد الفاتح يوسف أبوعاقلة
حرست الكتمة راكز
والحجر عضّيتو
ما كان القلب عاجز
لكنّي غطّيتو
كدّيت الصبر يا ريت
لو دَرّة لي زيتو
غافلني القطا
اتباشرت باريتو
داهمني السراب
البدري عديتو
عصارة هجير
ساساقة مليتو
طاف بى اليقين
طوالي شديتو
باصرت الضيار
حنستو لوليتو
قام براحة ساق
وصلّني لى بيتو
ضي في الدّهمة بان
أنا دربو قصيتو
دجيت بيو كتير
طشيت وخاتيتو
زي اب لمبة كان
في حجانا ظنتيتو
ما  وصلني ميس
باب ريح  وسديتو
في عز الضهاب
سير ناقتي حليتو
فوق الجابرة كان
أنا سرجي دليتو
نوختو وبرك
توب تعبو فريتو
وين تاني العلوق
يا العاصي جافيتو
قدامك رهاب
صبحتو ماسيتو
خليت بى وراك
دربا مضى نسيتو
تعبر في الفراغ
تمسحتو واسيتو
ويا دابك حلب
دمك ؤصفيتو
جافيت الخدار
ولا هيفو شميتو
شان عزف اليباس
لحنك وغنيتو
راجيك الكتير
ال إنت ما رجيتو
حظك كيف يكون
سطرك ؤفطيتو
ما قلت ليك قبيل
في مدني خليتو
في الليم القديم
شارع كبري عاشة
وفي طعم الغباشة
في سوق أم سويقو
تملاك البشاشة
وفي القبة الضمينة
مأوى الصالحين
لى ناس العشير
ناس ترحاب وزينة
لى حي المزاد
الأشواق دفينة
خالدة مع السنين
ود أزرق هناك
التاية الحنينة
أرجع لى الدباغة
وأسراره الدفينة
ميس للكادحين
ودكنان أمان
لى أفراحنا مينا
لى دردق سلام
سدرتنا المتينة
وحي المبدعين
أمشي على البيان
ونغمات الكنينة
في عتره الخدار
حاضن أحلى طينة
والأصل المتين
لى حنتوب كمان
وظلالة الرهينة
لى دار أم بلال
وأشعاره وحنينه
وكباشي الحسين
مارنجان رواية
للإنسان حكاية
صافية كما المراية
ؤدار للطيبين
أم سنط العتيقة
رايقة كمان رقيقة
سارة الناظرين
جزيرة الفيل حبابة
يبهر نور شبابة
وفيها ولف متين
حي البان فراشة
تنعم بى دعاشة
وتلاقيك بشاشة
من الساكنين
***
ما تنسى الكريبة
للأرحام قريبة
فيها عكاظ أديبة
تاية العابرين
الدرجة القيافة
هادية مع الظرافة
تنسي الجاها شافه
كل تعب السنين
حلق وأمشى فوق
مر بى شندي فوق
تتسامى وتروق
ؤتلقى الصامدين
ود أزرق عريق
برفق بى المضيق
فيو نعم الصديق
فيصل والإزار
عووضة الرفيعة
فيها خلوق بديعة
عمرت الوسيعة
بى عرق النهار
لى حبيب الله زاروا
كوجاك سوا كارو
مسرح في الصقيعة
وفي عز النهار
حي الطملة داره
عجت بالدبارة
بى ناس البصارة
هينين سايحين
***  
كسرة
بلد راكز ما بتحول
حي الثورة
وقسمو الأول
وارث دنقس
وبادي الأول
من السني ؤود كنان
ؤشيخ شاطوط
وأب شبكة ضمان

***   
كسرة  1
البوشي  العالم ؤخريجين
سعدابي  الجاهد  أحيا الدين
في المساح رمضان وسرور
كمان عمر أحمد يناجي طيور
روايع الكاشف خالده دهور
تفرهد جوه مهج في صدور
سانتو إبراهومة وعمر النور
جنقول الطب جروح ؤكسور
***   
             2 كسرة
أيقظت العوالم ذكراك التشرف
هاج شاهد المعالم قال ليك إت مخرف
وين هدا التقولو ما يبست حقولو
وما بتقدر تعرف
حال الحال يبكي هاجر طيرها يابس
لا ريش لا غناوي
والبغشاها عابس كرفس ليها وشو
ؤبوزو يمطو لاوي
ؤقالت يافطة: ابسم ؛ كيف وسط البلاوي
والفاقة التكاوي
ولا خياط عراوي قادر يلقى حاجة
في ميس الغناوي
الجفت لهاته
وطار قمريها فاته
والجمام معاند
مقلوب نازي نازل
ما بلل رفاته

***  

                                محمد الفاتح أبوعاقلة
                                 الخرطوم  2011م

الاثنين، 31 مارس، 2014

جد جدك



جد جدك زمـان وجدودو قبلو كمان

كانوا شباب وطالوا احتلوا أكبر شان

بدري بنومـوا بدري بصلو للرحمن

الواحد كلس مكروب صميـم ضكران

***

أخو الأخوان ولد من واجبة ما بتأخر

من عرق الشباب لى كبرو عمر ؤوفر

الجدع النجيض الفي المحاصات دفـر

بفرح كونـو أغبش وبالتراب بتعفّـر

***   

في زمن الصبا البدري العمل جـد لازم

عشان عودك طري أخدر ضراعك حازم

قوم داقش ؤكابس ليـل نهارك صـادم

سو اخدم ؤوفر شان تعيـش ماك نادم
***
يا حليل يوم نقولا بنطرى ناس الهمّة

جدودنا زمان بنو وختونا أعلى القمّة

ليش ما نبني نحن جديد نوفّي الذّمة

عيالنا يقولو يا حليل اللي كانوا أئمّة

***

ما عاد الشباب حارس الوظيفة وقاعد

عرف القصة شَدّة حيل والله بسـاعد

بى تمويل بسيط ببدا ويقول يا واحـد

عملا حر أكيد بيهـو بتبينلو شـواهد

***

الكف الخشن بعجب رسولنا محمـد

صلّى الله عليه العند إلهـو ممجـد

عمل بى كفـو لى كل المكارم حـدد

واسع رايـو للكل حاشـا ما بتشدد

*** 
                               محمّد الفاتح أبوعاقلة 

الثلاثاء، 25 مارس، 2014

سندة بسيطة



   الشَّاب البعايـن بكـرة زي المتلــو
  عشمـو كبير يجكن في الأمل ؤيشتلو
  مِـد ليهو الصبر حبل المحنة افتلـو
  والمحرية هي السندة البسيطة تتكلو
                           ***
  عملك بى الضراع دي عبادة أنفع ليك
  تكسب كل شي ؤترد جميـل والديـك
  بتحرس الوظيـفة القاسية غادي عليك
  ما خايلة العطالـة الفي الفقر ترميـك
              ***       
                                                 محمَّد الفاتح أبوعاقلة     

قيمة العمل



تربال واللا حداد واللا نجـار واللا بنَّا
سواق واللا سبَّاك كلو انجاز في وطنا
قيمة العرق البهتِّف وبيهو بنحقق أملنا
يوم نمد الإيد بيبقى يوم نهايتنا وأجلنا
                                                                               *** 
كيف أكل الشباب لى الوفـرو الشياب
ما كانت زمان قولة الصبي غاب جاب
لكن هسي في Face book وفي WhatsApp
بذاكر فيها وأرضو البايرة تحتو غراب
        ***     
                                              محمد الفاتح أبوعاقلة

الثلاثاء، 18 مارس، 2014

صدق الشاعر حقاً !


لقد صدق وأبدع الشاعرمحمَّد مهدي الجواهري
والذي يقول في بعض أبيات قصيدته (ثورة الوجدان)، معبِّراً عن حال الأمة العربية كلها!   
سَكَتُّ حتَّى شَكَتَنْي غُرُّ أشعاري         واليومَ أنطِقُ حُرّاً غيرَ مهذارِ
سلَّطتُ عقلي على مَيلي وعاطفتي     صَبْراً كما سَلَّطُوا ماءً على نار
ثُرْ يا شُعورُ على ضَيْـــمٍ تُكابدُهُ       أوْلا فلستَ على شيءٍ بِثَوَّار
وقَّعْتُ أُنشودتي والحـزنُ يملُؤهـا        مَهابَةً ونياطُ القلبِ أوتاري
في ذمَّــةِ الشِّعْرِ ما ألقى وأعظَمُهُ     أنّي أُغنّي لِأصْنامٍ وأحجــار
الشعبُ شعبي وإنْ لم يرضَ منتبذٌ   والدارُ رغمَ " دخيلٍ " عابَني داري
لَوْ في يدي لحَبَسْتُ الغيثَ عن وطَنٍ  مسْتَسْلِمٍ وقَطعتُ السلسلَ الجاري
ما عابَني غيــر أنّي لا أمُدُّ يداً         إلى دنيءٍ وأنّي غيــرُ خوّار

الأحد، 16 مارس، 2014

قطع اخدر

الزول (9)

الزول مابجيب طاري الرفاقـة قوالة

ولا بروغ للهمايل باري ليـها طوالا

أحدب جِرّق القاسيـة إن وطا الملالة

ما سمع العشامى فخشمو قولة لالا
                                 محمد الفاتح أبوعاقلة

قطع أخدر

الزول (8) 


الزول ما البزاول من ضليلو وخامل

الزول في ثبات جبل إن سمعلو قنابل

الزول بالتي أحسـن رفاقتـو بعامل

   قومابي وبشوش أجواد تكنو الوابـل  
                                      محمد الفاتح أبوعاقلة