الاثنين، 3 يناير، 2011

اليتيم Orphan

اليَتيـم
أ‌.   محمَّد الفاتح يوسف أبوعاقلة
ضُلَّ السارية رفَّاي للبعيد ومتـرَّك
هضليم الكباس عسكر عليهُ وفـرَّك
يا زارع السمح أولى اليتيم اتحـرَّك
داك ريق الفطيم لهطان يحن لى درَّك
***
الحي في الوسيـعة دروبو سالكة وماهلة
يومـاً مرنة مطروحـه ؤمرَّات قاحلـة
ما بتدري الوديعة متيـن تكون الرَّاحلة
سمحة المـدَّة بالدَّس لى اليتيم السَّاهلـة
***
زمـان أوروك يا مخلوق معاني السَّمتة
وكان خيـر الانام باليُتمى دايماً يرتـى
هاتين هاتو هـو والتانيـة فيهـا أفتى
في الفـردوس سوا بالرُّوح ؤثم الجتـة
***
الولد الأبوهـــو هميـم وأمو نبيهـة
البت الربــت بين أمهـــا ؤواليهـا
ديـل زرع الصحاح محروس مميز جيـهة
وين عاد اليتيــم سارح وحيد في التيها
***
الجاهل اليتيم وصونـا بى تربايتــو
نرعى ندرجو بيناتنــا تربى قنايتـو
ما ضاق الحنـان دفق اليتـم لى لبايتو
هيلا على اليتيم نتولى نحـن رعايتـو
***
المال شن لزومو إن ما عدل للمايلة
والدنيا أم قدود شبه السحابة الجايلة
في فد مـرَّة ترحل ما بتدوم  الزايلة
هيلا على اليتيـم قبَّال تحر القايلـة
***  
إن مـرَّ اليتيم بيناتنـا نمسـح راسـو
نكسي ننعلتـو نحن السمـح حُرَّاسـو
في فصل الدروس يمسك كمان كرَّاسو
عز سودانو بكـرة ؤهو البمتن ساسو
***
درفوناً نَتَف ريشو العدم قلاهـــو
في الوحـدة وعدم ليم العصير خلاهو
شـن معنانا إنْ سبناهـو نحن براهـو
نبقى مرقنـا من الذُّوق ؤمـن معناهو
***

ليست هناك تعليقات:

إرسال تعليق