الخميس، 30 مارس 2017

سمحة الدنيا

سمحة الدنيا
*** 

 د.محمد الفاتح أبوعاقلة
مهما تعكر الدنيا وتطمبــج عوسه
قادرين نطفى نيرانه وبنعرف دوسه
بالحكمة ودبار عاتي الأمور بنسوسة
بى بسمة سخا وبى فطنتن مدروسة
***
الزول أصلو بالناس ؤبالسمح بتباشر
بتعدى البتحصل وحاشـا ما بتكاشر
إن سـوّا العديل من أصلو ما بتفاشر
بصلح بين جماعتو وبالفضل بتعاشر
***  
سمحة الدنيا بى العفو والصبر نحياها
سمحة الطيبة في زايلة وعويش مبناها
دوام مركب على الله بتلقى لى مرساها
بى عون الله ترسى وعاقة ما بتغشاها
***  
الهادي الأمين للخير دوام هادينا
المن الله محكومة وغصب تأتينا
ميت وميتون معلومة أصلا فينا
القرعة بتقع مرات تشيل عاتينا
***
يا ما في القبور زينين إلاهنا كفيلن
خلفو لينا طاري عديل ونفلا هيلن
شن بنسوي غير نصبر كمان ندعيلن
جنات الرضا الفردوس تملي مقيلن
***     
الغلط البقع بين الخلوق بتراجـع
العفو والسمح سودانا ما بصاقع
واليابا الصلح ده حقيقة ما بتتابع
والزول الحكيـم إياهو هو البترابع
*** 

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.