الاثنين، 13 أغسطس، 2012

كرري


كَرَرِي
                       شعر محمّد الفاتح يوسف أبوعاقلة
في كرري النفل ظاهر متمـم فاشـو
ضرباً كان تقيل خلع الدخيل وأوغاشو
استعزى الأسود لى الله قدلو وهاشـو
اندكت حشود والشهدا حلقو عاشـو
***
كرري حديثة أكبر من تقولو قصايـد
شمخت شرّفت ضي السعود متزايـد
قول يا راوي جيب اقطع نشيداً فايـد
حَرَن الفارس أب جبة أب سلاحاً صايد
***
هدر حس الحديد والنار لهوبة اتعرّب
واب سَلَطيِّة في ميس الجبال بتقلَّـب
تيـتل ود فضيل كبّر ضراعو مكرّب
محنان كتشنـر فوق البشوفو مغلَّـب
***
كرري الدنيا ما بتقـدر توفِّي حقوقا
المكسيم يقـح والخيـل مرتب روقة
الدّخان كَتَـم والفِجّة زَرْ مخنـوقـة
ثابتين في اليقين والآخرة صادقة بروقة
***
عثمان أزرق الحاضر القلب ما اتضارى
الحرب التّبُـق من حينهـا بالِـع نارا
الجبـة المرقعـة والسيـوف كَبّـاره
والصّهليب حِمَى والفِجَّة قادحة شرارة
***
كرري كلامة نادر يوم صهيل بَحّاتة
قُدّر ما بتلين يـوم الدّواس صّلاتَـة
الفَرَقة التّسدّها ليـها دافعـه حياتـا
رب العِـزّة نوّر بالشهــادة وطاتا
***   
كرري دروسا للكون أصلو مافي متيلا
آيات الجهـاد فهمت حروف ترتيلا
منبور يا أب دروع الجُلَّـة ما راتيلا
قرى أورادو قام والعَرْكَة كان عاتيلا
***
دفروا على الزّريبة يسدِّوا خشم المدفع
واردين للشهادة العركـة ليهم مُشْرع
يعقوب صـادم الجيش الحديدو مدرّع
خيل الكارا في ميس الفـلاح تتضرّع
***
هادي الأمة حين دارت تسو صح سوّت
ربها جـاد عليها وفت عهودها النـوّت
الفارس البصـوم يوم الكماج ما اتقوّت
صاقعـة تَلْوِي فوق هام المعانـد خوّت
***
راس غردون زمـان راسمالو ضربة هـاري
مستعمـر لئيـم لى كـل شينـة يبـاري
شاف لصفي البروق في سيوف دميها سواري
طار راســو انجدع نعمنو مقطوع طـاري
***
وجات كرري البخيتة وعمّ في الكون ظيتا
أرواح الجـدود في الجنـّة رايغـة مبيتـا
اتعقـدوا الطروف لى الله فــروا ربيطـة
والختّوهـا راكـزة قويـة مانعـة وهيطة
***

ليست هناك تعليقات:

إرسال تعليق