السبت، 28 ديسمبر، 2013

زمن وجداني ... شعر محمد الفاتح يوسف أبوعاقلة

زَمَن وجْدَاني
                                                                  محمد الفاتح يوسف أبوعاقلة 

تاريكِ يا بهرة صباح المهلة 

في ميسك مروج العافية 
بين سرب الصّفا النّوراني 
تمرحي والمواعيد وافية
ما مزعوبة 
بى سكة هجير مكروبة 
سالكة دروبة
يا المكنونة عن أمك وعن حبوبة
ماك مغلوبة بى هم البكون والكان
إلا براك 
شاشاك السماح نماك
ؤلاقاك الفهم غناك
ها مافيش أم طعم ملاك
زي ما تدوري تلقي مناك
يوماتي الدعاش بغشاك
عاجبو هَناك 
ؤباقي غطاك
كل الزين قريب ؤحداك
غيمة من الفراش في سماك
هو عاجبو نداك
والنور البرشو ضياك
إن دار السموم يصلاك
تسرع غيمة تتلافاك
بى الهيف والنسيم لافاك
أدرجي بى دواديب الفرح لا تهمي
إنت جباك روحي ودمي
يللا على البراريب لمي
في ضل السعود انجمي 
أوعى تهمي لا تغتمي 
بى الني  المباري الدنيا ما تتسمي
أبقي براك نجيضي وصمي !
حن القمري 
في فروع الشدر طاريك
أصلا سمّح القوقاي 
عشان يرضيك
أمسكي قوي 
من نتلة هبوب الغيرة 
ما ترميك
غدار الخلوق متمني 
يرمي عكارو في صافيك
قانص 
قَجْ شرك رغباتو في واديك
وينك لسّه
يا الفيك الوصوف والقصه
سر المعنى
والنغم البغنو عليهو نَمّة وهسّه
إنت براك بى طب القلب مختصّه
فوتك عالي 
عشاقك خلوق مرصّة
بدري وهسه
ما ها غريبة ...المخلوق بحب الطيبة!
وإنت الطيبة طيب الطيبة!
في بحر الطيوب بتنوري
تغرفي منو زي ما تدوري
كل صبحاً شرق بتدوري
تملي الساحة 
بالبسمة الشفاها ضروري
لى مرضي المطول منسي
ما فتيتو ما قصيتو لى مخلوق
ؤتلعبي بى الرحيق بى ذوق
مع مراح الظبا المطلوق
تُمام كيفك على كيفك
تَمام كيفك!
عقارب الساعة ماخده براحه
ما منكربه
اليوم كلو يرجع تاني شان كيفك
ها مافيش تاني 
غير زمنك زمن وجداني
ما براني
مافيش تاني 
غير طعمك طعم خصاني
جوه الجوه 
اتحكر قبض شرياني 
في أم آلبينة الإحساس 
هبش مسّاني.. صِر مهبوش
ؤمافيش تاني 
غير زمنك زمن هزّاني !
....
                                                             محمد الفاتح يوسف أبوعاقلة

ليست هناك تعليقات:

إرسال تعليق