الاثنين، 17 فبراير، 2014

القوقاي

                             القُوقَـاي  
شعر محمد الفاتح يوسف أبوعاقلة
صاحية قمرية بتقوقي
في فرع سَيـَّالة مايل
جَرَّح القوقـاي لهاته
إلا برضو غناها خايل
قطَّرت سحر المشاعر
في مسامع الدنيا سايل
ساهرة نص الليل براها
قوقـي قوقايك دلايـل
لا أليف رك في فريعك
لا جناك في عشو قايل
كلو مقدورك وحـظك
قوقي نسيـنا الهوايل
قوقي يا ست الخمايل
ليك علينا كتير جمايل
*** 
النجوم شهدت عليـك
رقرقت لصفت جناحك
والغيوم شَرَّت سماها
جاوبت ترداد نواحـك
السُّقد حرد الحوامـة
صن شان مهموم بحالك
النسيـم بى خفة جالك
طبطبك قال ليك مالك
الصباح صارع ضلامو
دار يزيحو عشان أذالك
قوقي يا قمريـة قوقي
نحن مجروحيـن كذلك
الغنا المـر في لهاتك
زي غنانا كسير وهالك
برضو بنقولـو ونغني
مالنا بالأحـزان ؤمالك
***
قيمة الحي يوم يباصر
للحزانى يقيف يناصر
بالنهار كان حر صلاهم
والوجع بالليل محاصر
إنت يا نغم القمـاري
ساري نص الليل مهاجر
يا مسك حسسك رؤانا
يا سهرت براك مسافر
ؤنحن والقمرية شاهدين
حُرقة الحلـم المكاجـر
ما بيدور يصبح حقيقة
ولا بطيـب لينا خاطر
كلو بتعـدَّى ونفوتـو
ونحن عارفين الله قادر
***
صوت مرق بالليل يجارد
جملة أوجاعة الكبيـسة
هفهفت جنحيـن ؤرعشة
غاتسة في الحالة التعيسة
عش جناها حصاد شقاها
مرمي كبد الطين هريسة
تترعـش مبلولـة ركت
ما لقت في الفجة ميـسة
قشة يابسة وريش كساها
قنقليتـه كـرو يبيـسه
شوف حياته قصاد حياتك
  شوفه إنت براك وقيـسه !
***

ليست هناك تعليقات:

إرسال تعليق